Mat 10 | GbrGAW | STEP | Yesu wa yi wa bara awo-cei-aba wa ga a iko a kun azafun nukwoyi ya, ɓai ka anyasan doho-dohoi pya gna.

Matthew 10

Awyidna Nna Bei Ga Abara

1 Yesu wa yi wa bara awo-cei-aba wa ga a iko a kun azafun nukwoyi ya, ɓai ka anyasan doho-dohoi pya gna.

2 – 3 – 4 ^{▼▼The text of verses 2-Mat 10:4 has been merged.} Owa bara aye nu nyi:

Siman (ai je wo yi ge Bitrus),
Andrew (Bitrus zado),
Yakub (Zebedi nugun),
Yohanna (Yakub zado),
Filibus,
Bartalomaus,
Toma
Matta (Godu goyi),
Yakub (Alfis nugun),
Siman (Siyasa da),
Yahuda Iskariyoti (eza wo ɓo kun Yesu nyi).

Awyidna Nna Ɓei Ga Abara

5 Yesu wa tnu ɓa wa gaɓa gbe ge, “Fye to lo abyedo aba kwo a Samariyayi aba m. 6 Fye bwa a Israila yi abanu lo, akni bwi-bwiyi. 7 Lo fye gna ɓage, Shekwoyi ebe la wo vi-vi. 8 Fya ka anyasan yi gna, fya ku a fi-fiyi kala, fya ka a kuturu gna, fya kun azafun nukwoyi ya. Fya gacauta, shi fya gwo cauta.

9 “Fye to lo na gyiwyei shi m. 10 Fye to la pwakun, ko aje do, kwo abuada, kwo busi zan-zan nya: Ntu ge aza n fye lo fye bma ɓa zhin nyi ɓa ɓa ga fye nyagyi. 11 Esa nu fya lo ezhi yakwo ko ezhi ɓi-yi, fye zan Shekwoyi za shin fya fyi n wo puwa har esa nu fye ɓakun n ʼzhi yi, fya lo ezhi do. 12 Esa nu fya nya ɓo ntu ge a ye ge fye lofi; fya ku ze anugundo. 13 N fya gye Shekwoyi za puwa nu, fya tu ɓa anabarka, nto lo nu n, fya ku fye anabarka shi. 14 Ezhi doho-dohoi, kwo puwa n fya lo, to kwa gwo fye m, fya lu abwi-tukun ya n fya pita fya kun. 15 Gaiciya! N wada wyi yi, Sodom n Gomora yi ɓo ku du ɓa n sauci bwa.

16 “Mi tnu fyei ngye akni fi na cam-cam tasin. Fye la ce ngye awa, ntna ɓaina ngye a lukpe. 17 Ama mi ye fya kpe ge a ɓa wan fye, ai da fye wa, ai iu fye fi na aduwa nyakun. 18 E-har ma fye ɓa gni-agni n gwamna abye ɓedo asuyi ntu ʼMi ʼye ɓo. Deye kwo ɓei ga fye sa ntu ge fya zhin mi saida n ɓa bye ɓedo n na nyi yi vinya.

19 “Sa na wan fye, fye to wo dna n ɓoi fye ɓa da n na wada ba m, ntu ge aɓei wu fye ɓo fye ɓada n ko sai. 20 Ntu ge efye nu ta da ɓo m, ama zafun efye Dada nya n wo dna ʼshe nyi, wo ɓa daɓo n fye gbe yi.

21 “Eza ɓei bwi wo zado har efi, adada ɓei bwi ɓa ʼɓi. Aɓi ce ɓei kuka da ɓa dada har koi zhin ɓa fi. 22 Aza ɓei wun fye nu, ntu ge fye zhin ma nya nu. Amma eza n wa mi gni har nyalo-nyalo, wo ɓa pwo.

23 “Ndei a ga fye wahala n ʼzhi, fya kun fya lo ezhi do, miɓa jeze ɓe kafin fye zo azhi zan vinya. 24 Makaranta ɓi to du wo malamin, ko fyenu ntu wo pida tukon. 25 Makaranta ɓi zhin wa ɓe wa sun ngye wo malami, fyenu lo nu ngye wo pida. Ntu cenu, shi ɓa ku mi yi ge ‘Shetan’, n mi zhin fye Dagayi nyi, balle efye! 26 Ama fye towo aza dna n ɓa ga fye wahala nyi m. Ntu ge esa ɓe lo n gaiciya ɓa da kwohin: eɓa asiri a kpeya pei-pei.

27 “Enya n mi gnafye dna n wyegmaa nyi fye la begye tu fya da kwo n nyipyei yi. Aɓo sanya n mi gna fye nyi fye knitu n nyakun she fya da ɓa.

28 “Fye to wo aza dna n ɓa wu fye anayi kawai m, ama fye wo Shekwoyi dna n wo nu ikoyi wa wu nahi ɓedo n wye-wyei dna n na napyi. 29 Gbakolowyi (asi ɓa akninya? Ngun aba kabo?) Doho-dohoi to lo n kwo ɓa fi to efye Dadai kpe kwo ɓo m. 30 Efya tukwo-yi kudo-kukui lo vinya. 31 Ntu ce nu fye to damun, fye du agbakolowyi lo ampanyi.

32 “Eza n wa da Mi ɓo pei-pei na za ʼba ge Mi zhin wo nugundo nu, Mi hin miɓa da wo ɓo ge wo zhin mi nugundo nu n Mi Dada abye, wo dna ʼshe nyi. 33 Ama eza n wa nama ɓo, mi hin miɓa nawo aɓo n Mi Dada abye, n wo dna ʼshe nyi.

34 “Fye to gye ge ma ɓe, na sese lafiya nyai nu n nanyi mi m, sai ebe yako. 35 Ma ɓe ntu ge ma zhin nugun wa zhin gaba n wo dada yi. Nyigun wa zhin gaba n wo ʼya yi, tnayi wa zhin gaba n wo viya yi. 36 Eza nuwun-yi ɓa bwa jekun n wo puwa nu. 37 Ndei ho ye ho dada n ho ʼya yi n dumi, ho to kunce lo ha ze mi nya m. Ko ho ye ho nugun ko nyigun n du mi, ho to kunce lo ha ze mi nya m. 38 N ha gnage ho ta la ho zundu ha vi mi m, ho to kunce lo ha ze mi nya m.

39 “N ha kpema ho wye-wyei, ko ɓa ho bwi, ama n ha ga ko ntu mi ɓo, kwa ho pwo.

40 “Aza n ɓa gwo fye, ɓa gwo mi nu! Aza ɓa gwo mi, ɓa gwo Shekwoyi nu n wa tnu mi nyi. 41 N ha gwo anabi ntu ge wo zhin Shekwoyi za nu, ho ɓei gwo lada dai-dai n anabi yi. N ha gwo aza manayi kwo aɓefye-cei ntu ɓa ɓemanayi zhin ɓo, ho ɓei gwo lada dai-dai n ɓai.

42 “Efye n fye zhin Ema tukwo shanyi, nfya ga eɓi nawyi nuwan fu-fuyi, lallai fye ɓa bwa lada.”